Патэнцыйны пераслед

Кіра - валанцёрка з Мінска. У лютым 2021 года яе затрымалі ў межах крымінальнай справы, узбуджанай за «ўдзел у групавых дзеяннях, якія груба парушаюць грамадскі парадак», і змясцілі пад варту. Знаходзячыся ў СІЗА, яна страціла дзіця з-за пагаршэння здароўя, выкліканага жорсткімі ўмовамі ўтрымання.

5 жніўня 2021 года Кіру адпусцілі пад даручальніцтва, аднак ужо 25 жніўня яе зноў выклікалі да следчага. Баючыся паўторнага зняволення, яна была вымушана пакінуць краіну.

Жанна была асуджаная за ўдзел у акцыі пратэсту, якая адбылася 6 верасня 2020 года ў Гродне супраць фальсіфікацыі прэзідэнцкіх выбараў і гвалту ў краіне. Яна была прыгаворана да адбывання пакарання ў папраўчай установе адкрытага тыпу, пасля чаго ёй давялося пакінуць Беларусь.

У 2024 годзе стала вядома, што супраць Жаны ў рамках спецвытворчасці распачалі новую крымінальную справу і завочна асудзілі па артыкуле аб "садзейнічанні экстрэмісцкай дзейнасці".

Аляксей быў затрыманы і двойчы асуджаны за каментары, пакінутыя на адрас сілавікоў пасля смерці Рамана Бандарэнкі ў ТГ-канале «Карнікі Беларусі». Пад ціскам яго прымусілі разблакаваць тэлефон. У кватэру прыходзілі з ператрусам 4 разы, шукалі грошы, зброю, наркотыкі і забароненую сімволіку, а таксама наклалі арышт на тэхніку.

У снежні 2021 года Аляксею ўдалося збегчы з ПУАТ і пакінуць краіну.

Алег, юрыст "Офіса па правах людзей з інваліднасцю", быў затрыманы ў лютым 2021 года па абвінавачанні ў махлярстве.

Вызвалены пад даручальніцтва 31 ліпеня 2021 года.

Вадзім быў асуджаны ў межах крымінальнай «справы карагодаў», узбуджанай пасля акцыі пратэсту, якая праходзіла 13 верасня 2020 года ў Брэсце.

У снежні 2024 года стала вядома, што ў дачыненні да Вадзіма адбылося завочнае судовае паседжанне аб замене абмежавання волі на пазбаўленне волі ў калоніі.

Іван, актывіст анархічнага руху, упершыню быў затрыманы ў разгар жнівеньскіх пратэстаў супраць вынікаў выбараў 2020 года. Падчас затрымання ён падвергся жорсткаму збіццю, у выніку чаго доўгі час быў вымушаны перамяшчацца толькі на інваліднай калясцы.

Чарговы раз Івана затрымалі восенню таго ж года. Яго абвінавацілі ў перакрыцці дарог у ноч з 10 на 11 жніўня 2020 года каля гандлёвага цэнтра "Рыга" ў Мінску. Пазней ён быў асуджаны за "ўдзел у групавых дзеяннях, якія груба парушаюць грамадскі парадак".

У кастрычніку 2024 года стала вядома, што ў адносінах да Івана адбылося завочнае судовае паседжанне аб замене абмежавання волі на пазбаўленне волі ў калоніі.

Сцяпан быў збіты міліцэйскім бусам на сустрэчнай паласе 15 лістапада 2020 года падчас пратэстнай акцыі памяці забітага сілавікамі Рамана Бандарэнкі на праспекце Пушкіна ў Мінску, адразу ж затрыманы і моцна збіты. Быў асуджаны за нібыта хуліганскія дзеянні — наўмыснае і беспадстаўнае здзяйсненне не менш як трох кідкоў у бок міліцэйскіх аўтамабіляў, што прывяло да іх пашкоджанняў.

Андрэй быў затрыманы 11 жніўня 2020 года па крымінальнай справе аб масавых беспарадках, узбуджанай пасля пачатку масавых пратэстаў супраць вынікаў прэзідэнцкіх выбараў. Ён падвергся жорсткім збіццям супрацоўнікамі ГУБАЗіКа для дачы патрэбных ім паказанняў. Андрэя асудзілі за "ўдзел у групавых дзеяннях, якія груба парушаюць грамадскі парадак".

Быў асуджаны за абразу і пагрозу прымянення гвалту ў дачыненні да прадстаўніка ўлады.

У жніўні 2021 года стала вядома, што Зміцер уцёк з папраўчай установы і пакінуў Беларусь.

Уладзіслаў быў затрыманы ў межах крымінальнай справы, узбуджанай па падзеях 14 ліпеня 2020 года ў Менску, калі людзі выйшлі на вуліцы ў знак пратэсту супраць рашэння ЦВК не рэгістраваць кандыдатамі ў прэзідэнты Віктара Бабарыка і Валерыя Цапкала. Ён быў асуджаны па артыкуле "Гвалт або пагроза прымянення гвалту ў дачыненні да супрацоўніка органаў унутраных спраў".

22 жніўня 2021 года Уладзіслаў уцёк з папраўчай установы і пакінуў Беларусь.

Яўген быў затрыманы ў Маскве па абвінавачанні ў супраціве міліцыі падчас жнівеньскіх пратэстаў 2020 года ў Брэсце і ўзяты пад варту.

Вызвалены 30 ліпеня 2021 года.

Сяргей, былы дэсантнік і сузаснавальнік арганізацыі "Паспалітае рушэнне", быў затрыманы за ўдзел у акцыях пратэсту і прыгавораны да адміністрацыйнага арышту. Пасля ён быў вымушаны пакінуць Беларусь з-за распачатага крымінальнага пераследу.

Арсеній быў затрыманы ў рамках крымінальнай справы, узбуджанай пасля акцыі пратэсту, якая прайшла 13 верасня 2020 года ў Брэсце, дзе людзі спявалі і вадзілі карагоды, а супраць іх быў ужыты вадамёт. Яго асудзілі за "ўдзел у групавых дзеяннях, якія груба парушаюць грамадскі парадак". Па версіі абвінавачання, з-за прастою тралейбуснага і аўтобуснага паркаў быў нанесены ўрон у памеры каля 660 беларускіх рублёў.

У снежні 2024 года стала вядома, што ў дачыненні да Арсенія адбылося завочнае судовае паседжанне аб замене абмежавання волі на пазбаўленне волі ў калоніі.