Вольга Антонаўна Лойка

галоўны рэдактар палітыка-эканамічнага блока ў TUT.BY, журналістка. Вольга скончыла тры ВНУ — БДУ, БДЭУ і Оксфардскі ўніверсітэт, а на Tut.by разам з аналітыкам Сяргеем Чалым вяла праграму «Эканоміка на пальцах». Зменена мера стрымання 17 сакавіка 2022 года.

Вольга была затрыманая 18 траўня 2021 года ў межах крымінальнай справы, распачатай супраць TUT.BY за ўхіленне ад выплаты падаткаў у асабліва буйным памеры (ч. 2 арт. 243 Крымінальнага кодэкса). Таксама яна абвінавачваецца на падставе ч. 3 арт. 130 КК (распальванне іншай сацыяльнай варожасці, учыненае групай асоб) і ч. 3 арт. 361 КК (заклікі да санкцый, учыненыя з выкарыстаннем сродкаў масавай інфармацыі).

17 сакавіка 2022 года з СІЗА-1 выйшлі на волю галоўная рэдактар палітыка-эканамічнага блока навін Вольга Лойка, намеснік генеральнага дырэктара па тэхнічных пытаннях Аляксандр Дайнека і менеджэр Publisher Box Андрэй Аўдзееў. Ім была зменена мера стрымання, абвінавачанні не зняты.

У кастрычніку 2022 г. КДБ уключыў Вольгу ў спіс "асоб, якія маюць дачыненне да тэрарыстычнай дзейнасці".

9 студзеня 2023 г. у Менскім гарадскім судзе пачынаўся разгляд справы супраць найбуйнага беларускага незалежнага партала TUT.BY. Судовы працэс ад самага пачатку зрабілі закрытым. Справу разглядае суддзя Валянціна Зянкевіч.

Галоўрэда TUT.BY Марыну Золатава і дырэктара ТАА «ТУТ БАЙ МЕДЫА» Людмілу Чэкіну 17 сакавіка 2023 года прысудзілі да 12 гадоў калоніі кожную.

У красавіку 2023-га Мінскі гарадскі суд выклікаў дэпутата Валерыя Варанецкага, палітолага Яўгена Прэйгермана і кіраўніка Рэспубліканскага саюза прамыслоўцаў і прадпрымальнікаў (РСПП) Аляксандра Швеца ў сувязі з іх паручальніцтвам за Алену Талкачову і Вольгу Лойку - ім прызначылі штраф па 18,5.

Алена Талкачова, Вольга Лойка і Кацярына Ткачэнка не з'явіліся на судовы працэс, бо з'ехалі за мяжу. Як паведамляюць праўладныя тэлеграм-каналы, крымінальная справа ў дачыненні да іх выдзелена ў асобную судовую вытворчасць. Яны аб'яўлены ў вышук.