Андрэй працаваў IT-спецыялістам. 9 сакавіка 2022 года, праязджаючы на машыне па горадзе, ён заўважыў расійскі вайсковы «КАМАЗ» з літарай V, сфатаграфаваў яго на тэлефон і адправіў здымак у тэлеграм-канал «Беларускі Гаюн», які неўзабаве ўлады прызналі «экстрэмісцкім фарміраваннем».
У канцы сакавіка таго ж года Андрэя затрымалі ў яго дома супрацоўнікі ГУБАЗіК, наладзіўшы дзеля гэтага сапраўдную «спецаперацыю». На допытах на яго жорстка ціснулі, а пасля затрымання на праўладных каналах з’явілася «пакаяннае» відэа з ім. Спачатку яму інкрымінавалі яшчэ і ўдзел у «экстрэмісцкім фарміраванні», але да суда гэтае абвінавачанне не дайшло.
У жніўні 2022 года Андрэя прызналі вінаватым па крымінальнай справе, узбуджанай па артыкуле «Садзейнічанне экстрэмісцкай дзейнасці», за адпраўку гэтага фотаздымка. На судзе суддзя пацікавіўся, чаму ён даслаў здымак у «Беларускі Гаюн», а не ў дзяржаўныя СМІ.
Вызвалены ў снежні 2023 года, цалкам адбыўшы прызначаны судом тэрмін пакарання.
