78-гадовая Ніна Багінская стала сімвалам пратэстаў 2020-га. Фатаграфіі, як яна трымае нацыянальны сцяг у руках, публікаваліся ў шматлікіх замежных СМІ.
На свой першы пратэст яна выйшла яшчэ ў 1988 годзе ў Курапатах пад Мінскам, дзе знаходзяцца масавыя пахаванні беларускіх ахвяр сталінскага рэжыму. Пазней Багінская ўдзельнічала ў акцыях апазіцыі, якія праводзіліся ў памяць аб Чарнобыльскай катастрофе, аб зніклых апазіцыйных палітыках, у знак пратэсту супраць анэксіі Крыма. Яе шмат разоў затрымлівалі, выпісвалі штрафы. "Мне трэба пражыць 120 гадоў, каб іх усё выплаціць" - казала Ніна ў інтэрв'ю. З 2016 года з пенсіі Багінскай сталі адымаць 20% на аплату штрафаў, а з 2017-га - ужо 50%. У 2016 годзе судовыя выканаўцы канфіскавалі ў пенсіянеркі мікрахвалёўку і пральную машыну. Яшчэ праз некалькі гадоў дзяржава арыштавала і выставіла на продаж дзве яе дачы.
Багінская тлумачыць сваю актыўнасць пачуццём абавязку перад нашчадкамі.
У 2025 годзе аснову абвінавачання па крымінальнай справе супраць Багінскай склалі адміністрацыйныя пратаколы і судовыя пастановы за 2024 год.
Ніна Багінская мае шэраг цяжкіх захворванняў і мае патрэбу ў своечасовым урачэбным лячэнні. У турэмных умовах яе жыццю можа пагражаць сур'ёзная небяспека.
Ніну прызналі вінаватай у "неаднаразовым парушэнні закона аб правядзенні масавых мерапрыемстваў", але замест пакарання прызначылі "прафілактычнае назіранне".
