Міхаіл быў прызнаны вінаватым у траўні 2021 года па крымінальнай справе аб гвалце ў дачыненні да службовай асобы — кантралёра "Мінсктранса" Паўла Максімовіча — і аб абразе Лукашэнкі.
Паводле абвінавачання, 23 верасня 2020 года каля 7:20 раніцы ў дачыненні да Міхаіла быў распачаты адміністрацыйны працэс за безбілетны праезд у тралейбусе № 27 на прыпынку "Механіка-тэхналагічны каледж" у Мінску. Паколькі пры сабе ў яго не было дакументаў, якія пацвярджаюць асобу, яму прапанавалі выйсці з тралейбуса і чакаць прыбыцця міліцыі. Паміж Міхаілам і кантралёрам адбыўся канфлікт, падчас якога, паводле версіі абвінавачання, Міхаіл лаяўся нецэнзурна і выказваў негатыўнае стаўленне да дзейнай улады.
