У верасні 2021 года Наталля адбыла 30 сутак адміністрацыйнага арышту за рэпосты матэрыялаў «экстрэмісцкіх» каналаў. Гэта было падчас масавых затрыманняў у межах крымінальнай справы, узбуджанай за каментары ў інтэрнэце пасля гібелі ў Мінску супрацоўніка КДБ Дзмітрыя Фядосюка і IT-спецыяліста Андрэя Зельцэра.
2 лістапада 2021 года Наталлю затрымалі па крымінальнай справе аб зборы і распаўсюдзе персанальных дадзеных. Ці знаходзілася яна ў зняволенні да суда, невядома.
У лютым 2022 года на закрытым судовым паседжанні Наталлю прызналі вінаватай па крымінальнай справе, узбуджанай па артыкуле «Незаконныя дзеянні ў дачыненні да інфармацыі аб прыватным жыцці і персанальных дадзеных», за збор і распаўсюд персанальных дадзеных супрацоўнікаў МУС.
Паводле падлікаў праваабаронцаў, яна была вызвалена ў траўні 2022 года, цалкам адбыўшы прызначаны судом тэрмін пакарання.
