Юрыя Дабрахотава затрымалі 20 красавіка 2023 года па падазрэнні ў “дробным хуліганстве”, але абвінавачанне прад'явілі за ўдзел у акцыі пратэсту ў 2020 годзе. Пасля ператрусу, праведзенага па месцы жыхарства, у кватэры нібыта знайшлі слоік з невялікай колькасцю марыхуаны.
Падчас суда Дабрахотаў не прызнаў віны па двух складах злачынства. Ён растлумачыў, што ў верасні 2020 года пасля працы ўбачыў шмат людзей, якія накіроўваліся ў бок праспекта Пераможцаў. Ні з кім з іх знаёмы не быў. Людзі перасоўваліся па тратуарах. Пайшоў разам з імі, увайшоў у натоўп, бо яму было цікава, што там робіцца. З сабой у яго якой-небудзь забароненай сімволікі не было. А па абставінах прад'яўленага абвінавачання ў захоўванні наркатычных рэчываў, ён паведаміў, што 4 месяцы ў яго ў гасцях у кватэры пражываў нехта А. калі той з'ехаў, то часова пакінуў у яго ў кватэры некаторыя рэчы, сярод якіх пазней была знойдзена банка з "травой".
Пры затрыманні Юрыя збівалі супрацоўнікі міліцыі.
Па сукупнасці злачынстваў, канчаткова прызначанае пакаранне ў выглядзе пазбаўлення волі на тэрмін два гады. 20.10.2023 адбыўся разгляд апеляцыйнай скаргі.
