Пераслед па палітычных матывах

Мікалай, сябра Аб'яднанай грамадзянскай партыі, быў затрыманы ў снежні 2021 года ў межах крымінальнай справы, узбуджанай па артыкуле «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх». Прычынай затрымання, паводле наяўнай інфармацыі, сталі падпіскі на забароненыя Telegram-каналы і фатаграфіі з мірных акцый пратэсту ў жніўні 2020 года ў сацыяльных сетках. Таксама вядома, што на папярэдніх прэзідэнцкіх выбарах яго ўжо затрымлівалі і змяшчалі на "суткі".

У сакавіку 2022 года, пасля трох месяцаў зняволення, Мікалай быў прызнаны вінаватым і прыгавораны да абмежавання волі без накіравання ў папраўчую ўстанову адкрытага тыпу.

Зміцер быў прызнаны вінаватым у снежні 2021 года па артыкулах «гвалт або пагроза прымянення гвалту ў дачыненні да супрацоўніка органаў унутраных спраў» і «абраза прадстаўніка ўлады» за каментар, пакінуты ў суполцы «Свабодны Нясвіж» у адрас начальніка ААПП Нясвіжскага РАУС Валерыя Траяноўскага, у якім, на думку абвінавачвання, утрымлівалася пагроза прымянення гвалту ў дачыненні да пацярпелага.

Настасся была затрымана разам з маці ў снежні 2021 года ў рамках крымінальнай справы, узбуджанай па артыкуле «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх», і ўзята пад варту ў СІЗА.

У сакавіку 2022 года яе прызналі вінаватай і прыгаварылі да абмежавання волі без накіравання ў папраўчую ўстанову адкрытага тыпу, вызваліўшы ў зале суда пасля абвяшчэння прыгавору.

20 верасня 2023 года Анастасія цалкам адбыла тэрмін абмежавання волі.

Станіслаў быў затрыманы 24 лістапада 2021 года па адміністрацыйнай справе. Аднак пасля адбыцця арышту на волю ён не выйшаў з ІЧУ і быў пераведзены ў СІЗА па крымінальнай справе, узбуджанай па артыкуле «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх».

У сакавіку 2022 года яго прызналі вінаватым ва ўдзеле ў паслявыбарчых акцыях пратэсту, якія прайшлі ў 2020 годзе, і прыгаварылі да абмежавання волі з накіраваннем у папраўчую ўстанову адкрытага тыпу.

Пакінуў Беларусь да пачатку адбыцця пакарання.

У лютым 2025 года ў рамках спецвытворчасці адбылося завочнае судовае паседжанне па пытанні замены абмежавання волі на пазбаўленне волі ў калоніі.

Аляксандр быў прызнаны вінаватым у снежні 2021 года па артыкуле "абраза прадстаўніка ўлады" за каментар, які складаўся з аднаго слова і пакінуты ў сацыяльнай сетцы "Аднакласнікі" у адрас супрацоўніка міліцыі Войніча.

Аляксандр мае трэцюю непрацоўную групу інваліднасці і на момант судовага разбору даглядаў амаль сляпога 83-гадовага бацьку. Незадоўга да суда ён адмовіўся ад шпіталізацыі ў сувязі з перадынсультным станам, бо хацеў асабіста ўдзельнічаць у судовым паседжанні па сваёй справе. Тым не менш суд прыгаварыў яго да абмежавання волі і абавязаў выплаціць кампенсацыю маральнай шкоды "пацярпеламу".

Андрэй быў прызнаны вінаватым у снежні 2021 года па артыкуле "абраза прадстаўніка ўлады" за каментар, пакінуты ў TikTok на адрас супрацоўніка інспекцыі па справах непаўналетніх Сяргея Лоўчага і ўчастковага інспектара Аляксандра Есюлевіча.

Юры быў прызнаны вінаватым у снежні 2021 года па артыкуле "абраза прадстаўніка ўлады" за каментар у адрас старшага ўчастковага інспектара Бабруйскага ГУУС Андрэя Комара, пакінуты ў сацыяльнай сетцы "Аднакласнікі" пад пастом аб падзеях на пікеце Сяргея Ціханоўскага.

Леанід, былы супрацоўнік Мінскага трактарнага завода, быў прызнаны вінаватым у снежні 2021 года па крымінальнай справе, узбуджанай па артыкуле "абраза прадстаўніка ўлады" за каментары, пакінутыя ў Telegram у адрас двух супрацоўнікаў АМАПа — Мікалая Якімюка і Мікіты Сапранькова.

Вольга была затрымана 22 лістапада 2021 года на працоўным месцы ў краме «Востраў чысціні». Увечары яе адпусцілі, аднак на наступны дзень ізноў затрымалі і змясцілі ў СІЗА да суда.

У красавіку 2022 года Вольгу прызналі вінаватай па крымінальнай справе, узбуджанай па артыкулах «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх» і «апаганенне збудаванняў і псаванне маёмасці», і прыгаварыліі да абмежавання волі без накіравання ў папраўчую ўстанову адкрытага тыпу.

Вольга, валанцёрка ПСА «Анёл», была затрыманая і асуджаная за ўсталяванне пудзіла, па версіі следства, падобнага на Лукашэнку ў раённым цэнтры на Варшаўскай шашы.

Дар'я была прызнана вінаватай у студзені 2021 года па крымінальнай справе, узбуджанай па артыкуле "гвалт або пагроза прымянення гвалту ў дачыненні да супрацоўніка органаў унутраных спраў", за пашкоджанне курткі міліцыянта Аляксея Гарунова падчас акцыі пратэсту, якая адбылася восенню 2020 года ў Брэсце.

Паводле прэс-службы МУС, Аляксей быў затрыманы па абвінавачанні ў «фінансаванні пратэстаў». Сцвярджаецца, што ён атрымліваў на банкаўскую картку ахвяраванні і ў перыяд з жніўня 2020 года па студзень 2021 года дапамагаў аплачваць штрафы ўдзельнікам пратэстаў.

Быў вызвалены пад падпіску аб нявыездзе.

У снежні 2021 года Андрэя прызналі вінаватым у абразе супрацоўніка міліцыі з Гродна Уладзіміра Казлоўскага — міліцыянта, які ўпаў падчас бойкі 29 траўня 2020 года на пікеце па зборы подпісаў за вылучэнне Святланы Ціханоўскай кандыдатам у прэзідэнты.

Пакінуў Беларусь да пачатку адбыцця пакарання.

У снежні 2024 года ў рамках спецыяльнай вытворчасці адбылося завочнае судовае паседжанне па пытанні замены абмежавання волі на пазбаўленне волі ў калоніі.

Рыгор быў прызнаны вінаватым у снежні 2021 года па артыкуле аб абразе прадстаўніка ўлады за каментар, пакінуты ў сацыяльнай сетцы «Аднакласнікі» 27 траўня 2020 года пад пастом, на якім было размешчана фота старэйшага ўчастковага Бабруйскага ГУУС Камара.

Рэгіна, стваральніца Іўеўскага музея нацыянальных культур, была прызнана вінаватай у верасні 2021 года па артыкуле "абраза прадстаўніка ўлады" за каментары, пакінутыя ў Telegram у адрас намесніка начальніка АУС Іўеўскага райвыканкама Андрэя Ярохіна і старшага інспектара Валерыя Горбача.

2 лютага 2022 года стала вядома, што яе арыштавалі на 10 сутак за парушэнне рэжыму адбыцця "хатняй хіміі". Падчас адбыцця пакарання Рэгіна аб'явіла галадоўку. Паведамлялася таксама, што яе змяшчалі ў ШІЗА.

У сакавіку 2022 года да Рэгіны больш за 25 разоў прыходзілі з праверкамі. Яна не магла атрымаць дазвол на паездку ў Ліду для пакупкі матэрыялаў для рамесніцтва і фактычна пазбавілася магчымасці працаваць. Таксама паведамлялася пра дадатковыя абмежаванні, у тым ліку забарону на наведванне касцёла і шэраг бытавых абмежаванняў.

Пасля чарговага затрымання і знаходжання ў СІЗА ў цяжкіх умовах Рэгіна была вымушана пакінуць Беларусь.

У снежні 2024 года ў рамках спецвытворчасці адбылося завочнае судовае паседжанне "аб замене абмежавання волі без накіравання ў папраўчую ўстанову адкрытага тыпу".