19 студзеня 2022 года Дзмітрыя разам з сябрам Уладзіславам Бандарыкам затрымалі на Нямізе, калі яны здымалі відэаагляд дронаў для ютуб-блога: супрацоўнікі АМАПа праверылі тэлефоны і знайшлі фота і відэа з Маршу 16 жніўня 2020 года ў Мінску. У ІЧУ на Акрэсціна затрыманых білі.
Праз некалькі дзён Дзмітрыя прыгаварылі да 15 содняў адміністрацыйнага арышту за нібыта непадпарадкаванне пры затрыманні, а ў апошні дзень арышту абвясцілі падазраваным па крымінальнай справе. Пасля тыдня ў карцары на Акрэсціна яго перавялі ў СІЗА-1, дзе ён правёў каля двух месяцаў.
У красавіку 2022 года Дзмітрыя прызналі вінаватым па крымінальнай справе, распачатай па артыкуле «Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх», за ўдзел у гэтым маршы, прыгаварыўшы да абмежавання волі з накіраваннем у папраўчую ўстанову адкрытага тыпу.
Вызвалены ў лістападзе 2024 года, цалкам адбыўшы прызначаны судом тэрмін пакарання.
