Яна вучылася на біялагічным факультэце МДУ і перамагала на міжнародных алімпіядах па біялогіі. У 2020 годзе яна зарэгістравалася назіральніцай на выбарах на платформе «Зубр».
22 лютага 2022 года, калі Яна прыехала дадому на канікулы, яе затрымалі падчас ператрусу ў кватэры. Падставай стаў фотаздымак з аднаго з маршаў 2020 года, знойдзены ў яе сацыяльных сетках. Разам з Янай затрымалі яе сястру Таццяну Барысовіч і маці, якой суд прызначыў 15 содняў адміністрацыйнага арышту.
У чэрвені 2022 года Яну прызналі вінаватай па крымінальнай справе, узбуджанай па артыкуле «Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх», прыгаварыўшы да абмежавання волі з накіраваннем у папраўчую ўстанову адкрытага тыпу. Пасля прысуду яе вызвалілі з-пад варты да пачатку адбывання пакарання.
Праз некалькі дзён у кватэры правялі новы ператрус, і неўзабаве Яна пакінула Беларусь. Вучобу ва ўніверсітэце ёй давялося пакінуць.
У снежні 2024 года ў рамках спецыяльнай вытворчасці адбылося завочнае судовае паседжанне па пытанні ўзмацнення віду пакарання.
