Грамадзянін Украіны.
Падрабязнасці пераследу ўкраінскага егера сталі вядомы з прапагандысцкага фільма 11 верасня 2023 года, які паказалі адразу на ўсіх дзяржаўных каналах. У ім Вячаслава на следчых дзеяннях вадзілі на ланцугі. Камітэт дзяржбяспекі паведаміў, што затрымаў у Беларусі шэсць чалавек па абвінавачанні ў супрацоўніцтве з "Службай бяспекі Украіны" і "падрыхтоўцы тэрактаў". На відэа некаторыя з іх выглядаюць збітымі, некаторых на следчых дзеяннях водзяць на ланцугах, аднаго з затрыманых знялі ў СІЗА КДБ. У выніку трох чалавек абвінавацілі адразу па шасці артыкулах Крымінальнага кодэкса, у тым ліку "Здрада дзяржаве" і "агентурную дзейнасць".
Украінскага егера Вячаслава Бародыя затрымалі 1 верасня 2023 года ў Ельскім раёне Беларусі, які мяжуе з Жытомірскай вобласцю Украіны. Вядома, што Вячаслаў нарадзіўся ў Жытомірскай вобласці, некаторы час жыў у Мазыры, а потым вярнуўся ва Украіну і працаваў егерам, выхоўвае трох дзяцей. У фільме расказалі, што Бародый пасля пачатку поўнамаштабнай вайны нібыта прайшоў падрыхтоўку ў навучальным цэнтры Галоўнага ўпраўлення разведкі Мінабароны Украіны і што "з сакавіка 2023 года, акрамя ГУР Мінабароны, ён стаў супрацоўнічаць яшчэ і са Службай бяспекі Украіны".
