Юрый і Сяргей Пляшкун пазнаёміліся ў 2020 годзе падчас паслявыбарчых пратэстаў. Паводле версіі следства, тады яны выходзілі на праезную частку з бел-чырвона-белым сцягам і перакрывалі рух на цэнтральных вуліцах Мінска.
28 лютага 2022 года Юрыя затрымалі па справе аб падрыхтоўцы да акта тэрарызму. Абвінавачанне сцвярджала, што мужчыны збіраліся знішчаць расійскую ваенную тэхніку, якую перакідвалі праз Мазырскі раён, і дзеля гэтага з жніўня 2020 года назапашвалі кампаненты для «кактэйляў Молатава». Дзяржаўнае тэлебачанне паказала запіс са схаванай камеры ў гаражы, дзе яны нібыта абмяркоўвалі пашкоджанне чыгуначных пуцей.
У лютым 2023 года пасля закрытага судовага працэсу Юрыя прызналі вінаватым па крымінальнай справе, узбуджанай па некалькіх артыкулах, у тым ліку за падрыхтоўку да акта тэрарызму і да прывядзення ў непрыдатнасць шляхоў зносін, і прыгаварылі да вялікага тэрміну пазбаўлення волі.
Сімвалічнай хросніцай палітвязня стала дэпутатка нямецкага Бундэстага Джаміля Шэфер.
